Todalasgalicias entraña, desde o seu propio nome, toda unha declaración de principios. Asume, interpretándoas na linguaxe de hoxe, as verbas de Ramón Piñeiro cando, dirixíndose aos participantes no Congreso da Emigración Galega de Buenos Aires celebrado en 1956, dicía:

“Coa emigración, Galicia tivo e ten unha gran perda económica, mentres que humana e espiritoal, agrandouse o seu ámbito. Como realidade humana e espiritoal, o pobo galego afinca en varios paises. O núcleo que vive fora do seu país constitúe unha forza social e espiritoal de gran dinamismo e eficacia, de tal xeito que ela é, de seu, unha dimensión específica de Galicia”.

En 1956 quedabánlle inda por vivir aos galegos as etapas máis intensas da súa historia migratoria, con maior protagonismo agora dos países da Europa máis industrializada na busca de mellores oportunidades de traballo, xunto ca atracción que segue exercendo América e, na mesma España, zonas como Madrid, Cataluña e País Vasco. De todo iso darían fé, entre outras importantes materializacións dentro e fora da Terra, a rica tradición asociativa das colonias dos galegos no exterior, feito que xogaría asemade un papel determinante na constitución dunha galeguidade sen fronteiras.

  Dende a Fundación Iniciativas 21, nacida a comezos do 2004 “co obxectivo de promover, impulsar e canalizar iniciativas que, dende unha perspectiva galeguista e socialdemócrata, contribúan ao desenvolvemento político e social tan necesario para o progreso económico e cultural de Galicia”, quixemos abrir unha ampla canle de comunicación con “todas as Galicias” espalladas polo mundo e cos novos galegos da inmigración que traballan hoxe en Galicia, procedentes de distintas terras e culturas. Servímonos así das novas tecnoloxías para impulsar unha sociedade galega do século 21 máis xusta, solidaria e respectuosa cos seus sinais de identidade. Conscientes tamén do potencial que representan hoxe os nosos galegos do exterior á hora de potenciar a presenza de Galicia no mundo.

  “todalasgalicias.net” irémola construindo, entre todos, equipo de traballo, participantes nos foros das distintas seccións e tamén coa incorporación, a través fundamentalmente, de ligazóns das aportacións doutros sitios web que comparten con nós vocación de comunicación con todalasgalicias.

Na imaxe temos "O primeiro mapa de Galicia coñecido" a descripción do Reino de Galicia, realizado no século XVI desde México polo frade galego Hernando Ojea

Ampliación da imaxe:

(JPG, 149.8 KB)